करोना विषाणूमुळे ओढवलेल्या संकटामुळे लागू करण्यात आलेल्या लॉकडाउनमुळे अनेकांच्या हातात भरपूर वेळ निर्माण झाला. प्रत्येकाने आपापल्या परीने त्या वेळाचा सदुपयोग करण्यासाठी वेगवेगळे उपक्रम राबवले आहेत. काही जण वेगवेगळे ऑनलाइन कोर्सही करत आहेत. अशाच पद्धतीने घरबसल्या मोडी लिपी शिकण्याची सुवर्णसंधी चालून आली आहे.
गडहिंग्लज येथील घाळी कॉलेजच्या मराठी विभागाने मोडी लिपी प्रशिक्षणाचा ऑनलाइन कोर्स आयोजित केला आहे. डॉ. नीलेश केदारी शेळके यांनी मोडी लिपीचा हा कोर्स डिझाइन केला आहे. त्यांच्या पहिल्या बॅचला चांगला प्रतिसाद मिळाला आहे. दुसरी बॅच २० एप्रिल ते २७ एप्रिल २०२० या कालावधीत होणार आहे. त्या बॅचला प्रवेश घेण्यासाठीची लिंक बातमीच्या शेवटी दिली आहे. (२० एप्रिल रोजीच्या ताज्या माहितीनुसार ही दुसरी बॅचही फुल झाली असून, पुन्हा असे कोर्स कधी होणार आहेत, याच्या माहितीसाठी बातमीच्या शेवटी दिलेल्या क्रमांकावर संपर्क साधावा.)
‘या कोर्सला कोणतीही फी नाही. आपल्या सोयीनुसार आणि वेळेनुसार शिकता येईल. कोर्स सुरू झाला, की दररोज सकाळी सातपूर्वी व्हिडिओची लिंक पाठवली जाईल. सहभागी व्यक्तींनी दिवसभरात सोयीने कधीही तो पाहून शिकायचे आहे. कोर्सची परीक्षाही घरातूनच द्यायची आहे,’ अशी माहिती डॉ. नीलेश शेळके यांनी दिली.
इतिहास काळातील अनेक महत्त्वाची कागदपत्रे मोडी लिपीत लिहिलेली आहेत. त्यामुळे या कागदपत्रांच्या अभ्यासासाठी मोडी लिपी येण्याची आवश्यकता असते. ऐतिहासिकदृष्ट्या महत्त्वाची असलेली मोडी लिपी घरबसल्या शिकण्याची संधी या कोर्सच्या निमित्ताने चालून आली आहे.
प्रवेशासंदर्भात माहितीसाठी संपर्क :
डॉ. नीलेश केदारी शेळके ९११२३ ४५१४८, ९४२११ १२४५५
